Muqdisho (Dawan)- Ra’iisul Wasaarihii hore ee Soomaaliya, Xasan Cali Khayre, ayaa ka digay in diyaaradaha aan duuliyaha lahayn ee hubeysan loo adeegsado khilaafaadka siyaasadeed, kaddib weerar uu sheegay in xalay lagu qaaday guriga Jeneraal Mahad Cabdiraxmaan Aadan oo ku yaalla degmada Doolow ee gobolka Gedo.
Khayre ayaa weerarka ku tilmaamay “weji cusub oo khatar ah” oo ku soo kordhay qalalaasaha Soomaaliya, isagoo sheegay in adeegsiga awood wax disha aan lagu xallin karin khilaafaadka siyaasadeed.
“Weerarkii diyaaradda aan duuliyaha lahayn ee xalay lagu qaaday guriga Jeneraal Mahad Cabdiraxmaan Aadan wuxuu muujinayaa weji cusub oo khatar ah oo ku soo kordhay qalalaasaha Soomaaliya,” ayuu yiri Khayre.
Ra’iisul wasaarihii hore ayaa tilmaamay in adeegsiga awoodda maamul uu sheegay in muddo-xileedkiisu dhammaaday aanu lahayn wax cudurdaar ah, isla markaana aan awooddaas lagu aamini karin maamul aan lahayn hannaan lagula xisaabtamo.
Khayre ayaa sheegay in Doolow ay tahay degmo xasilloon oo ka tirsan Jubaland, isagoo ka digay in diyaaradaha hubeysan lagu dhex geliyo murannada siyaasadeed ee dalka.
