Muqdisho (Dawan) — Muqdisho waxaa lagu qabtay munaasabad lagu xusayay Maalinta Caalamiga ah ee Daaweynta iyo Soo-celinta Awoodda Dhaqdhaqaaqa Jirka (World Physiotherapy Day) oo sannad kasta la xuso 8-da Sebtembar.
Munaasabadda oo ay iska kaashadeen Jaamacadda Ummadda Soomaaliyeed iyo Wasaaradda Caafimaadka iyo Daryeelka Bulshada, waxaa ka qeybgalay madaxda bahda caafimaadka, hay’adaha caalamiga ah, xirfadlayaal caafimaad, physiotherapists iyo aqoonyahanno.
Xuska sanadkan ayaa diiradda lagu saaray muhiimadda ay daaweynta jirku u leedahay soo celinta awoodda dhaqdhaqaaqa, ka hortagga naafanimada iyo hagaajinta tayada nolosha dadka qaba dhaawacyada ama xanuunnada saameeya dhaqdhaqaaqa jirka.
Xirfadlayaasha caafimaadka ee ka qeybgalay munaasabadda ayaa sheegay in adeegyada Physiotherapy-gu ay door muhiim ah ka qaataan soo kabashada bukaannada, gaar ahaan dadka qaba dhaawacyada, xanuunnada daba-dheeraada iyo xaaladaha sababi kara naafo.
Si kastaba ha ahaate, waxaa la tilmaamay in fahamka bulshada ee adeegga Physiotherapy-ga uu weli yahay mid hooseeya, taas oo qeyb ka noqon karta caqabadaha hortaagan in dadka u baahan adeeggan ay helaan daryeel ku filan.
