Soomaaliya (Dawan)- Maamulka gobolka Banaadir ayaa bilaabay qorshe ka jawaabista saameynta roobabkii xilliyeedka ka da’ay Muqdisho iyo daadad dhowaan ku dhuftay qaybo ka mid ah caasimadda, kuwaas oo ay injineerada Soomaaliyeed sheegeen inay muujiyeen daldaloolo ku jira nidaamka bullaacadaha magaalada.
Qorshahan ayaa lagu soo bandhigay kulan uu guddoominayay Guddoomiyaha gobolka Banaadir ahna Duqa magaalada Muqdisho, Xasan Maxamed Xuseen (Muungaab), maanta oo Arbaco ah, kaas oo ay ka qaybgaleen xubno ka tirsan guddiga gurmadka degdegga ah ee xilli-roobaadka iyo wakiillo ka socday shirkado gaar loo leeyahay oo ku lug leh dhismaha waddooyinka.
Mas’uuliyiinta ayaa sheegay in qorshuhu diiradda saarayo nadiifinta nidaamyada bullaacadaha, xoojinta waddooyinka muhiimka ah, iyo hagaajinta isku-xirka hay’adaha dowladda iyo la-hawlgalayaasha gaarka loo leeyahay si looga jawaabo roobabka culus, sida uu sheegay maamulka gobolka.
Tallaabadan ayaa timid kadib markii roobabkii da’ay Axaddii ay sababeen biyo fadhiisinno ka dhacay qaybo ka mid ah caasimadda, inkastoo aan la soo sheegin wax khasaare nafeed ama mid hantiyeed oo weyn.
