Jabuuti (Dawan)– Madaxweynaha Jamhuuriyadda Jabuuti Ismaaciil Cumar Geelle ayaa maanta ooIsniin ah daah-furay Madasha Caalamiga ah ee La-qabsiga Cimilada (ICAF 2026), taas oo ah shir heer sare ah oo soconaya muddo saddex maalmood ah, laguna gorfeynayo caqabadaha sii kordhaya ee isbeddelka cimilada ku haya dalalka Geeska Afrika.
Madashan oo soconaysa 21-ka Janaayo, ayaa isu keentay mas’uuliyiin dowladeed, khubaro caalami ah oo ku takhasusay cimilada, bahwadaagta horumarka iyo hay’ado caalami ah, si loo dejiyo istiraatiijiyado wax ku ool ah oo lagula tacaalo abaaraha soo noqnoqda, biyo-yarida, iyo khataraha kale ee deegaan ee gobolka.
Khudbad uu ka jeediyay xafladda furitaanka, Madaxweyne Geelle ayaa sheegay in isbeddelka cimiladu uu noqday “xaqiiqo maalinle ah oo si toos ah loo dareemayo,” isla markaana saameyn culus ku yeeshay nolosha iyo amniga bulshada gobolka. Wuxuu carrabka ku adkeeyay in la-qabsiga cimiladu uu haatan yahay tiir-dhexaadka istiraatiijiyadda horumarinta qaranka Jabuuti, gaar ahaan dhinacyada amniga cuntada, ilaalinta xeebaha, iyo adkeysiga kaabayaasha dhaqaalaha.
