Soomaaliya (Dawan) – Madaxa gargaarka bini’aadantinimo ee Qaramada Midoobay ayaa soo gaaray Soomaaliya si uu mas’uuliyiinta dowladda iyo saaxiibbada gargaarka ula yeesho wadahadallo ku saabsan baahiyaha bini’aadantinimo, dadaallada jawaab-celinta iyo maalgelinta, sida ay ilo xog-ogaal ah u sheegeen Dawan Media.
Tom Fletcher, oo ah ku-xigeenka Xoghayaha Guud ee Qaramada Midoobay ee Arrimaha Bini’aadantinimada iyo Iskuduwaha Gargaarka Degdegga ah, waxaa maanta oo Isniin ah kusoo dhaweeyay Muqdisho, Wasiir ku-xigeenka Arrimaha Dibadda Xasan Maxamed Cali iyo Guddoomiyaha Hay’adda Maareynta Musiibooyinka Qaranka (SoDMA), Maxamuud Macallin Cabdulle.
Ilo-wareedyo ka tirsan dowladda Soomaaliya ayaa u sheegay Dawan in uu la kulmi doono mas’uuliyiinta sar-sare ee dowladda inta uu joogo dalka, sidoo kalena uu booqan doono xeryaha barakacayaasha ee ku yaalla Muqdisho. Waxaa sidoo kale loo qorsheynayaa inuu u safro magaalada Baydhabo ee Dowlad-Goboleedka Koonfur Galbeed.
