Muqdisho (Dawan) – Madaxweynaha Soomaaliya Xasan Sheekh Maxamuud ayaa ku eedeeyay siyaasiyiinta mucaaradka ah inay ka soo horjeedaan hirgelinta doorasho qof iyo cod ah iyo nidaamka xisbiyada badan.
Wareysi uu Madaxweynahu siiyay barnaamijka Miisaan Podcast ee ka baxa Dawan ayuu ku sheegay in dowladda ay doonayso in dalku u gudbo nidaam dimuqraadi ah oo ku dhisan codka shacabka iyo xisbiyo siyaasadeed.
Madaxweynaha ayaa sheegay in dowladda ay waddo qorshe lagu gaarsiinayo Soomaaliya nidaam dimuqraadi ah oo ku saleysan codka shacabka.
Waxa uu sheegay in khilaafka ugu weyn ee u dhexeeya dowladda iyo mucaaradka aanu ahayn mid shaqsiyeed, balse uu yahay mid la xiriira jihada siyaasadeed ee dalka.
“Mucaaradku waxay rabaan in dalka uu ku sii jiro nidaamkii hore ee doorashooyinka dadban,” ayuu yiri.
Xasan Sheekh ayaa sheegay in dowladda ay dooneyso in siyaasadda Soomaaliya laga wareejiyo nidaam ku saleysan shaqsiyaad loona gudbo nidaam ay hoggaaminayaan xisbiyo siyaasadeed oo sharciyeysan.
