Muqdisho (Dawan)— Madaxweynaha Soomaaliya, Xasan Sheekh Maxamuud, ayaa xaqiijiyay inuu ku adkeysanayo hirgelinta doorashooyin toos ah dalka, isagoo sheegay inaan dib looga laaban doonin qorshaha ah in awoodda dib loogu celiyo shacabka si ay si toos ah ugu doortaan hoggaankooda nidaamka “qof iyo cod”, taas oo dammaanad qaadaysa matalaad dhab ah iyo nidaam dimuqraadi ah oo hufan.
Madaxweynaha ayaa hadalkan ka jeediyay casho-sharaf rasmi ah oo uu ku qabtay Qasriga Madaxtooyada ee Muqdisho, taas oo uu ku maamuusay hoggaamiyeyaasha iyo odayaasha dhaqanka Soomaaliyeed ee ka kala yimid gobollada dalka, si ay uga qayb qaataan caleemo-saarka ugaaska beesha Murusade. Kulankan ayaa loo arkaa kii ugu weynaa ee odayaasha dhaqanka sanadihii u dambeeyay.
Madaxweynaha ayaa ammaanay doorka odayaashu ka ciyaaraan nabadda, dib-u-heshiisiinta iyo ilaalinta midnimada dalka, isagoo sidoo kale soo bandhigay guulaha laga gaaray dhinacyada amniga, horumarinta nidaamka dimuqraadiyadda iyo ballaarinta maamul-dejinta.
Wuxuu tilmaamay in shacabka laga hor istaagay xuquuqdooda dastuuriga ah muddo 57 sano ah, isla markaana doorashooyin aan loo dhamayn ay horseedeen dhibaatooyin badan, gaar ahaan dhinaca amniga. Wuxuuna yiri:
“Waxaan ku adkeysanaynaa in shacabka Soomaaliyeed helaan xuquuqdooda dastuuriga ah si ay u doortaan hoggaamiyaha ay rabaan, taas oo noqon doonta markii ugu horreysay muddo 57 sano ah. Doorashooyinkii hore ee aan loo dhamayn waxay dhaxal siiyeen oo keliya dhibaatooyin, gaar ahaan amni darro.”
