Madaxweyne Xasan oo martiqaad rasmi ah u fidiyay siyaasiyiinta: “Albaabka wada-hadalku wuu furan yahay”

“Talo dhexda la dhigaa ma jirto,” ayuu yiri, isagoo sharxay in hadalkiisu uusan ka dhignayn in dowladdu diiddan tahay wadatashiga, balse ay muhiim tahay in la kala saaro talinta iyo wadatashiga. Wuxuu ka digay in haddii aan arrintaas la kala caddeyn, dalku uu isu beddeli karo meel fowdo ka jirto.

Madaxweynaha ayaa ugu baaqay siyaasiyiinta mucaaradka iyo waxgaradka Soomaaliyeed inay mudnaanta siiyaan danta qaranka, kana fogaadaan tallaabo kasta oo wiiqi karta xasilloonida iyo midnimada dalka.

“Waxaan aaminsanahay in mustaqbalka Soomaaliya lagu dhisi karo midnimo, wada-shaqeyn iyo ixtiraamka rabitaanka shacabka,” ayuu yiri.

Martiqaadkan ayaa imaanaya xilli Madaxweynaha uu difaacayay doorashooyinka qof iyo codka ah ee ka qabsoomay Koonfur Galbeed, Galmudug, Hirshabeelle iyo gobolka Banaadir. Wuxuu sheegay in 1,824,853 muwaadin ay isu diiwaangeliyeen doorashooyinka, halka 1,435 mas’uul lagu doortay codka dadweynaha.

Isagoo ka jawaabaya dhaliilaha loo jeediyay geeddi-socodka doorashooyinka, Madaxweynaha ayaa qiray in wax walba aysan u dhicin sidii la qorsheeyay ama la doonayay, isagoo yiri: “Wiil aan dhalan ma dhaamiyo.”

Wuxuu sidoo kale soo dhoweeyay siyaasiyiinta iyo mas’uuliyiintii hore ee aqbalay natiijooyinka doorashooyinka, inkastoo ay jiraan kala aragti duwanaansho siyaasadeed.

Madaxweynaha ayaa khudbaddiisa ku soo gabagabeeyay ballanqaad ah in dowladdu sii wadi doonto dagaalka ka dhanka ah Al-Shabaab, xoojinta amniga iyo hirgelinta doorashooyinka qof iyo codka ah, isagoo shacabka ugu baaqay inay garab istaagaan ciidamada qaranka.