Washington (Dawan) — Dowladda Maraykanka ayaa sheegtay in aysan faragelin doonin arrimaha gudaha ee Soomaaliya, iyadoo mar kale ku celisay in mowqifkeeda ku aaddan midnimada Soomaaliya iyo ilaalinta xaaladda hadda jirta inaysan wax isbeddel ah ku imaan.
Mascad Boulos, oo ah la-taliyaha Madaxweynaha Maraykanka ee arrimaha Carabta iyo Afrika, ayaa hadalkan ku sheegay wareysi uu siiyay telefishinka Al Hadath, isagoo xusay in Maraykanku u arko arrimaha la xiriira midnimada iyo mustaqbalka siyaasadeed ee Soomaaliya kuwo si buuxda ugu gaar ah dadka Soomaaliyeed.
“Mowqifka Mareykanka ee ku saabsan midnimada Soomaaliya iyo in la ilaaliyo xaaladda hadda jirta isma beddelin,” ayuu yiri Boulos, isagoo intaa ku daray in mustaqbalka arrimahan ay adag tahay in si horudhac ah loo saadaaliyo.
Wuxuu xusay in Soomaaliya ay taariikh ahaan ka koobnayd laba dal oo kala duwan, kuwaas oo si degdeg ah u qaatay go’aanka midnimo kaddib xornimada, inkasta oo ay horey ugu hoos jireen gumeysi kala duwan. Sida uu sheegay, go’aankaasi wuxuu ahaa mid ay si ikhtiyaari ah u qaateen dadka Soomaaliyeed.
“Arrintan, sida dhabta ah, waxay u taal dadka Soomaaliyeed, annaguna ma faragelin doono arrimaha gudaha" ayuu yiri, isagoo carrabka ku adkeeyay in Washington ay ixtiraamayso madax-bannaanida iyo go’aanka shacabka Soomaaliya.
