Mombasa (Dawan)— Markabka dagaalka ee ciidamada badda Mareykanka ee USS Ross ayaa 5-tii Sebtembar gaaray dekedda Mombasa, booqasho qorshaysan oo qeyb ka ah iskaashiga amni iyo kan badeed ee u dhexeeya Mareykanka iyo Kenya.
USS Ross, oo ah markab nooca Arleigh Burke-class ah oo ku qalabaysan gantaallada hagaya, ayaa booqashada u adeegsanaysa sahay, taageero saadka iyo xiriirro ay la sameynayaan dhinacyada Kenya, sida ay sheegeen ciidamada badda Mareykanka.
Susan M. Burns, oo ah ku-simaha safiirka Mareykanka ee Kenya, ayaa sheegtay in booqashada ay muujinayso awoodda iskaashiga labada dal, iyadoo sidoo kale muhiim u ah diyaar-garowga ciidamada iyo is-dhexgalka xirfadeed.
Kenya ayaa sanad kasta ka qeyb qaadata Exercise Cutlass Express, oo ah tababar amni-badeed oo uu Mareykanku taageero, kaas oo ay ka qeyb galaan dalal badan oo ku yaalla Bariga Afrika iyo galbeedka Badweynta Hindiya.
