Jabuuti (Dawan) – Markabka shidaalka qaada ee M/T Solas 7 ayaa dib u bilaabay safarradiisa ganacsi kaddib markii dayactirkiisa lagu soo gabagabeeyay sagaal maalmood, inkasta oo markii hore loo qorsheeyay inuu qaato 12 maalmood, sida ay Jimcihii sheegtay Wakaaladda Wararka Jabuuti (ADI).
Dayactirka markabka ayaa isugu jiray hawlo farsamo oo la xiriira badbaadada, ilaalinta qaybaha markabka iyo hagaajinta nidaamyadiisa shaqo, kuwaas oo muhiim u ah hubinta in markabku diyaar u yahay inuu dib ugu laabto safarradiisa.
Intii uu dayactirku socday, waxaa la kormeeray nidaamka sii-deynta gaaska, waxaana la daweeyay lagana ilaaliyay daxalka qaybaha hoose ee markabka. Sidoo kale, waxaa la nadiifiyay, la simay, dibna loo rinjiyeeyay qalabka marwaaxadaha markabka, halka la hagaajiyay dhuumaha biyaha qaboojinta si loo xaqiijiyo joogtaynta cadaadiska biyaha.
