Masar iyo Mareykanka oo ka wada hadlay xaaladaha Soomaaliya iyo Suudaan

Qaahira, 7 Maarso 2026 (Dawan) – Wasiirka Arrimaha Dibadda ee Masar, Badr Abdelatty, ayaa khadka taleefanka kula yeeshay wada-hadal wasiirka arrimaha dibadda ee Mareykanka, Marco Rubio, iyagoo ka wada hadlay xaaladaha ka taagan Geeska Afrika iyo dalka Suudaan.

Sida lagu sheegay bogga rasmiga ah ee Wasaaradda Arrimaha Dibadda ee Masar ee baraha bulshada, wasiirka arrimaha dibadda Masar ayaa ku celiyay mowqifka Qaahira ee taageeraya madax-bannaanida iyo midnimada dhuleed ee Soomaaliya, isaga oo si cad u muujiyay diidmada Masar ee aqoonsiga Somaliland.

Wasiirku wuxuu sheegay in tallaabo kasta oo lagu aqoonsanayo Somaliland ay ka hor imanayso sharciga caalamiga ah isla markaana ay dhaawacayso midnimada dhuleed ee Soomaaliya. Wuxuu sidoo kale ka digay in aqoonsigaas uu wiiqi karo xasilloonida gobolka Geeska Afrika, isla markaana uu saameyn ku yeelan karo amniga Badda Cas.

Dhanka kale, Badr Abdelatty ayaa carrabka ku adkeeyay muhiimadda ay leedahay ilaalinta amniga, madax-bannaanida iyo xasilloonida dalalka Soomaaliya iyo Eritrea.

Marka laga hadlayo xaaladda Suudaan, wasiirka arrimaha dibadda Masar ayaa ku baaqay in la ilaaliyo madax-bannaanida iyo midnimada dhuleed ee Suudaan, isagoo xusay muhiimadda ay leedahay taageeridda hay’adaha dowladda Suudaan iyo diyaarinta duruufaha ku habboon dib u bilaabidda wadahadallo siyaasadeed oo loo dhan yahay.

Masar ayaa sidoo kale sheegtay inay sii waddo dadaallada diblomaasiyadeed ee heer gobol iyo heer caalami si ay u taageerto Suudaan, isla markaana gacan uga geysato dadaallada lagu dejinayo xiisadda laguna soo celinayo xasilloonida dalkaas.