Qaahira (Dawan)— Dowladda Masar ayaa Soomaaliya ka dalbatay inay dardargeliso dadaallada lagu soo afjarayo xaaladda siddeed badmaax oo dalkaas u dhashay kuwaas oo lagu haysto xeebaha Soomaaliya.
Wasiirka Arrimaha Dibadda Masar Badr Abdelatty ayaa dhiggiisa Soomaaliya Cabdisalaam Cabdi Cali ka dalbaday in la xoojiyo dadaallada lagu sii daynayo siddeedda badmaax, isla markaana la xaqiijiyo badqabkooda. Dalabka ayaa yimid kulan ay labada wasiir Isniintii ku yeesheen Qaahira, xilli ay ka qeybgalayeen kalfadhiga 166-aad ee Golaha Jaamacadda Carabta ee heer wasiirro.
Arrintan ayaa salka ku haysa markabka MT Eureka, oo la afduubtay bishii May 2026, xilli la sheegay inuu marayay meel u dhow xeebaha Yemen, ka hor inta aan loo soo jiheyn dhinaca biyaha Soomaaliya.
Tan iyo markaas, Masar ayaa wadday dadaallo diblomaasiyadeed oo lagu doonayo sii-deynta badmaaxiinta. Qaahira waxay xiriir la sameysay mas’uuliyiinta Soomaaliya iyo Yemen iyo shirkadda iska leh markabka, iyadoo xoogga saaraysa badqabka badmaaxiinta iyo sidii dib loogu celin lahaa dalkooda.
Wasaaradda Arrimaha Dibadda Masar ayaa toddobaadkii hore sheegtay inay sare u qaaday xiriirrada ay la leedahay dhinacyada ay khuseyso, si loo dardargeliyo sii-deynta badmaaxiinta loona xaqiijiyo xaalado nololeed oo ku filan inta xal laga gaarayo arrinta.
