Maxaa hoos u dhigay faa’iidada Shirkadda Korontada Jabuuti?

Jabuuti (Dawan) – Shirkadda Korontada Dowladda Jabuuti ayaa sheegtay inay sanad-maaliyadeedka 2024 ku dhammaatay faa’iido dhan 1.46 bilyan oo faranka Jabuuti ah, taas oo u dhiganta ku dhowaad 8.2 milyan oo doolarka Mareykanka ah.

Xogta maaliyadeed ee shirkadda, oo uu dib u eegay Golaha Wasiirrada Jabuuti, ayaa muujisay in dakhliga guud ee shirkaddu uu gaaray 41.96 bilyan oo faranka Jabuuti ah, halka kharashaadka hawlgalka uu gaaray 40.50 bilyan oo faran, taasoo keentay faa’iidada la shaaciyay.

Si kastaba ha ahaatee, faa’iidada shirkaddu waxay hoos uga dhacday tii sanadkii 2023, markaas oo la diiwaangeliyay faa’iido dhan 2.9 bilyan oo faranka Jabuuti ah.

Warbixinta ayaa sidoo kale muujisay in dakhliga shirkaddu uu kor u kacay marka loo eego sanadkii hore oo uu ahaa 35.8 bilyan oo faran sanadkii 2023 balse uu gaaray 41.9 bilyan oo faran sanadkii 2024.

Kororka dakhliga ayaa inta badan ka dhashay iibka korontada iyo adeegyada kale ee shirkaddu bixiso, kuwaas oo gaaray 32.4 bilyan oo faran, marka loo eego 31.6 bilyan oo faran sanadkii ka horreeyay.

Dhanka kale, kharashaadka hawlgalka ayaa kordhay 26 boqolkiiba, wuxuuna ka kacay 31.2 bilyan oo faran sanadkii 2023 ilaa uu gaaray 39.4 bilyan oo faran sanadkii 2024.

Wax-soo-saarka korontada dalka ayaa isna kordhay 7.2 boqolkiiba, isagoo gaaray 763,851 megawatt-saac sanadkii 2024. Korontada la soo saaray waxaa ka mid ahaa 438,529 megawatt-saac oo laga helay isku-xirka korontada, 118,783 megawatt-saac oo ah matoorrada naaftada ku shaqeeya, iyo 206,539 megawatt-saac oo laga dhaliyay tamarta dabaysha.

Shirkaddu waxay lahayd 1,164 shaqaale sanadkii 2024, halka tirada shaqaalaha sanadkii 2023 ay ahayd 1,145. Sidoo kale, dowladda Jabuuti ayaa sheegtay in shirkaddu ay sameysay maalgashi dhan 2.1 bilyan oo faranka Jabuuti ah sanadkii 2024, kaas oo lagu maalgeliyay software, dhismayaal, qalab farsamo, agab xafiis, qalabka kombiyuutarada iyo gaadiid.

Warbixintu waxay muujinaysaa in inkastoo faa’iidada guud ay hoos u dhacday marka loo eego sanadkii hore, haddana shirkaddu ay sii wadday kobaca dakhliga, wax-soo-saarka korontada iyo maalgashiga kaabayaasha muhiimka ah.