Muqdisho (Dawan) – Hoggaamiyaha Xisbiga Ogaal, Cabdikariin Xasan Jaamac, ayaa sheegay in go'aankiisa ku aaddan isu soo taagga xilka Madaxweynaha Jamhuuriyadda Federaalka Soomaaliya uu ka dhashay daraasado iyo falanqeyn lagu sameeyay caqabadaha waaweyn ee dalka ka jira, isagoo xusay in la joogo waqtigii xalalka la gaarsiin lahaa shacabka.
Cabdikariin Xasan Jaamac oo wareysi siiyay barnaamijka Wakiil ee ka baxa Dawan Media, ayaa sheegay in isaga iyo kooxdiisu ay muddo ku howlanaayeen daraasad ku saabsan dhibaatooyinka dalka iyo meelaha ay ka jiraan nusqaamaha ugu waaweyn, islamarkaana ay kasoo saareen talooyin iyo xalal ay rumeysan yihiin inay wax ka tari karaan xaaladda Soomaaliya.
"Waxaan eegnay dhibaatooyinka waddanka ka jira, mashaakilka nolosha ee waddanka ka jira, meelaha ay wax ka dhiman yihiin ayaan cilmi-baarisyo ka sameynay, talooyinna waan kasoo jeedinay. Runtii waxaan is leenahay waxaa loo baahan yahay in talooyinkaas iyo xalka loo helay mashaakilkaas loo dhaweeyo dadka si dhibaatooyinka looga baxo." ayuu yiri, Cabdikariin Xasan
Isagoo sii faahfaahinaya sababta uu isu soo taagay, ayuu sheegay in Soomaaliya maanta u baahan tahay hoggaan awood u leh inuu isku waafajiyo xalalka jira iyo baahiyaha dhabta ah ee shacabka.
