Maxaa sababay in dib loo dhigo doorashada Galmudug?

Guddiga Madaxa Bannaan ee Doorashooyinka Qaranka ayaa muddo shan maalmood ah dib u dhigay doorashada Galmudug, kadib codsiyo uga yimid ururrada siyaasadda.

July 22, 2026

2 daqiiqo akhris

Waxaa qoray Zamzam Daqarre - Reporter

Galmudug (Dawan) – Guddiga Madaxa Bannaan ee Doorashooyinka Qaranka iyo Soohdimaha Soomaaliya ayaa ku dhawaaqay in muddo shan maalmood ah dib loo dhigay doorashada isku-sidkan ee Dawlad Goboleedka Galmudug, taas oo markii hore loo qorsheeyay inay qabsoonto 25-ka Luulyo 2026, balse hadda la qaban doono 30-ka Luulyo 2026.

Sida lagu sheegay war-saxaafadeed rasmi ah oo uu guddigu soo saaray, dib u dhigista ayaa timid kadib markii la tixgeliyay codsiyo iyo soojeedinno ay gudbiyeen ururrada siyaasadda ee ka qaybgalaya doorashada, kuwaas oo dalbaday waqti dheeraad ah si ay ugu dhammaystiraan diyaar-garowgooda iyo kormeerka hannaanka doorashada.

Guddigu wuxuu sheegay in go’aankan uu salka ku hayo muhiimadda ay ururrada siyaasadeed u leeyihiin hirgelinta doorasho loo dhan yahay oo hufan.

Maqaallo la xidhiidha

4 saac kahor

Turkiga oo dib u cusboonaysiiyay hawlgalka ciidamadiisa ee Soomaaliya

4 saac kahor

Qodobada ugu muhiimsan ee Wararka Dawan

“Kadib markii uu guddigu garwaaqsaday in ururrada siyaasaddu ay yihiin tiirka ugu muhiimsan ee laf-dhabarta u ah hirgelinta doorasho loo dhan yahay oo hufan, wuxuu go’aamiyay in doorashada dib loogu dhigo muddo shan maalmood ah,” ayaa lagu yiri war-saxaafadeedka.

Guddiga Madaxa Bannaan ee Doorashooyinka Qaranka iyo Soohdimaha Soomaaliya ayaa sidoo kale xaqiijiyay inuu sii wadi doono fududeynta dhammaan hawlaha la xiriira doorashada, isagoo ka shaqeynaya xallinta wixii caqabado ah ee jira iyo hubinta in codbixinta loo maareeyo si waafaqsan sharciga iyo habraacyada doorashada.

Dib u dhigistan ayaa muujineysa dadaalka guddiga ee lagu xaqiijinayo in doorashadu u dhacdo si hufan, isla markaana dhammaan ururrada siyaasadda ee tartamaya ay helaan fursad siman oo ay si nidaamsan ugu diyaar garoobaan ka qaybgalka doorashada.

Maqaallo kale oo aan kuu doorannay

4 saac kahor