Maxaan ka naqaan heshiiska socdaalka maraakiibta ee Soomaaliya ansixisay?

Soomaaliya, Maarso 5, 2026 (Dawan)– Golaha Wasiirada Soomaaliya ayaa ansixiyay Heshiiskii 1965 ee fududeynta Socdaalka Caalamiga ah ee Maraakiibta (FAL), kaasoo qayb ka ah dadaallada dowladda ee lagu casriyeynayo hannaanka dekedaha, loona yareynayo caqabadaha maamul, isla markaana lagu xoojinayo maamul-wanaagga badda.

Go’aankan ayaa yimid xilli uu socday kulan ay yeesheen Golaha Wasiirada oo uu guddoominayay Ra’iisul Wasaare Xamsa Cabdi Barre, iyadoo la tixgelinayo muhiimadda ay Soomaaliya u leedahay inay waafajiso waaxda dhoofinta badda halbeegyada caalamiga ah.

Sida lagu sheegay bayaan ka soo baxay Wasaaradda Dekedaha iyo Gaadiidka Badda, ansixinta heshiiskan FAL waxay gacan ka geysan doontaa in shuruucda dalka la waafajiyo hannaanka ay aqoonsan tahay Hay’adda Badaha Adduunka (IMO), taasoo kor u qaadaysa kalsoonida maalgashadayaasha iyo soo jiidashada shirkadaha waaweyn ee dhoofinta caalamiga ah ee dekedaha Soomaaliya.

Wasiirka Dekedaha iyo Gaadiidka Badda, Cabdiqaadir Maxamed Nuur, ayaa sheegay in ku biirista Soomaaliya ee heshiiska FAL ay tahay guul weyn oo laga gaaray dadaallada lagu fududeynayo habraacyada la xiriira imaatinka iyo bixitaanka maraakiibta ee dekedaha.

Waxa uu intaas ku daray in yareynta dib-u-dhacyada maamul iyo fududeynta shuruudaha dukumentiyada ay xaqiijin doonto in waaxda badda ee Soomaaliya ay u hoggaansanto qawaaniinta caalamiga ah iyo hab-dhaqannada ugu wanaagsan ee laga isticmaalo adduunka.

Dowladdu waxay sidoo kale qorsheyneysaa in la fuliyo barnaamijyo tababar oo loogu talagalay hay’adaha muhiimka ah ee dekedaha, oo ay ku jiraan kastamka, socdaalka, iyo hay’adaha caafimaadka, si loo hagaajiyo isku-duwidda hay’adaha dowladda ee ka shaqeeya goobaha laga soo galo badda.

Soomaaliya, oo ku taal goob istiraatiiji ah oo ka mid ah waddooyinka ugu muhiimsan ee maraakiibta adduunka ee Geeska Afrika, ayaa hiigsaneysa inay casriyeyso kaabayaasha dhaqaalaha ee badda si ay uga faa’iideysato goobta ay ku taal, korna ugu qaaddo doorkeeda ganacsiga badda ee gobolka.