Maxay FIFA ka tiri go'aanka loogu diiday garsoore Cartan gelitaanka Mareykanka?

Mexico City (Dawan) – Madaxweynaha xiriirka kubadda cagta adduunka ee FIFA, Gianni Infantino, ayaa sheegay in FIFA ay ka shaqeyneyso xal u helidda arrinta garsooraha Soomaaliyeed Cumar Cabdulqaadir Cartan, kadib markii loo diiday inuu galo dalka Mareykanka, balse wuxuu caddeeyay in FIFA aysan awood u lahayn inay xukunto go’aannada dowladaha ama hay’adaha socdaalka.

Infantino ayaa hadalkan ka sheegay shir jaraa’id oo Arbacadii ka dhacay magaalada Mexico City, ka hor furitaanka Koobka Adduunka 2026, isagoo sheegay in arrintani ay tahay mid muhiim ah oo ay FIFA si dhow ula socoto.

“Dabcan waa arrin muhiim ah,waa nasiib darro wixii ku dhacay Cumar, garsooraha Soomaaliya,” ayuu yiri Infantino.

Wuxuu intaas ku daray in FIFA ay sii wadi doonto wada-hadallada ku saabsan kiiska garsooraha, balse ay jiraan xadidnaan dhanka awoodda ah.

“Wax walba ma xukumno. Waan isku dayeynaa, waan ka wada hadli doonnaa, waan la hadli doonnaa. Waana arki doonnaa,” ayuu yiri.

Infantino ayaa sidoo kale sheegay in FIFA ay tahay hay’ad isboorti oo aan faragelin karin go’aannada dowladaha iyo hay’adaha amniga iyo socdaalka.

“Waa inaan ixtiraamnaa inaanan ahayn boqorrada adduunka oo xukumi kara dowladaha iyo booliska. Waxaan nahay hay’ad isboorti,” ayuu yiri, isagoo xusay in FIFA ay ku dadaaleyso sidii ay xal ugu heli lahayd arrintan.

Sidoo kale, wuxuu tilmaamay in cadaadis degdeg ah iyo buuq warbaahineed uu mararka qaar saameyn ku yeelan karo xal u helidda arrimaha noocan oo kale ah.

“Mararka qaar in si degdeg ah loo bilaabo qaylo iyo buuq waxay yeelan kartaa saameyn lid ku ah helitaanka xal,” ayuu yiri.

Cumar Cabdulqaadir Cartan ayaa la filayay inuu ka qeyb qaato howlaha garsoorka ee Koobka Adduunka, hase yeeshee waxaa loo diiday gelitaanka Mareykanka, taasoo ka hor istaagtay ka qeybgalka tartanka.

FIFA ayaa horey u xaqiijisay in go’aankaasi uu saameyn ku yeeshay ka qeybgalka Cartan ee tartanka, iyadoo arrintaas ay dhalisay falcelin iyo muran dhinaca isboortiga ah.

Dowladda Soomaaliya ayaa dhankeeda sheegtay inay ka xun tahay go’aanka, isla markaana ay dalban doonto faahfaahin dheeraad ah, halka garsoore Cartan uu u mahadceliyay FIFA, CAF iyo shacabka Soomaaliyeed taageeradii ay u muujiyeen.