Maxay Itoobiya uga jawaabtay eedeymaha hareeyay doorashadii dhacday?

Addis Ababa (Dawan) – Xafiiska Ra’iisul Wasaaraha Itoobiya ayaa difaacay doorashadii dalkaas ka dhacday 1-dii Juun 2026, isagoo beeniyay eedeymo ay soo jeediyeen qaar ka mid ah falanqeeyayaasha oo sheegayay in natiijada codbixinta horay loo sii go’aamiyay.

Qoraal uu xafiisku soo saaray 5-tii Juun ayaa lagu sheegay in in ka badan 54 milyan oo qof ay isu diiwaangeliyeen inay codkooda dhiibtaan, halka Guddiga Doorashooyinka Itoobiya uu xaqiijiyay in ka badan 50,188 goobood oo codbixin ah, kuwaas oo ka mid ahaa 52,000 goobood oo dalka laga diyaariyay si looga codeeyo.

Xafiiska Ra’iisul Wasaaraha ayaa sidoo kale xusay in doorashada ay ka qayb galeen in ka badan 10,438 murashax oo ka kala socday 42 xisbi siyaasadeed, kuwaas oo ku tartamay kuraasta Golaha Wakiillada Shacabka iyo golayaasha dowlad-deegaannada.

Dowladda Itoobiya ayaa doorashada ku tilmaantay “hannaankii ugu ballaarnaa uguna casrisanaa ee ka-qeybgal dimuqraadi ah ee taariikhda dalka.”

Qoraalka ayaa si gaar ah uga jawaabay eedeymo lagu sheegay in doorashadu ahayd “caleemo-saar” ama mid natiijadeedu horay u caddayd.

“Natiijo horay loo sii go’aamiyay uma baahna 83 kormeere madax-bannaan oo ka socda 37 dal oo Afrikaan ah, 65,299 kormeere rayid ah oo gudaha ah, ama 1,100 wariye caalami ah oo la aqoonsan yahay,” ayaa lagu yiri qoraalka.

Xafiiska Ra’iisul Wasaaraha ayaa sidoo kale soo xigtay qiimeynno ay sameeyeen kormeerayaal ka socday Midowga Afrika iyo IGAD, kuwaas oo sheegay in doorashadu ku dhacday hannaan sharci iyo hay’adeed oo si guud u taageeraya dowladnimada dimuqraadiga ah.

Sidoo kale, dowladda ayaa sheegtay in Guddiga Xuquuqda Aadanaha Itoobiya uusan diiwaangelin wax xadgudubyo xuquuq aadanaha ah intii ay socotay codbixintu, halka Isbahaysiga Kormeerayaasha Doorashooyinka Rayidka ah uu sheegay inuu si xor ah ula socday howlaha ka socday 99 % goobaha codbixinta.

Dhanka kale, dowladda Itoobiya ayaa ku eedeysay kooxo hubeysan inay isku dayeen inay carqaladeeyaan geeddi-socodka doorashada, iyagoo adeegsanaya weerarro, jid-gooyooyin iyo falal lagu abuurayo xasillooni-darro.

Xukuumaddu waxay sheegtay in cabashooyinka siyaasadeed lagu xallin karo hababka dastuuriga ah, hannaanka Wadahadalka Qaranka iyo hay’adaha dimuqraadiga ah ee dalka, iyadoo adkaysay in xagjirnimada iyo rabshaduhu aysan meel ku lahayn Itoobiya.