Maxay ka wada hadleen Madaxweynayaasha Masar iyo Eritrea?

Madaxweynaha Masar iyo dhiggiisa Eritrea ayaa ka wada hadlay xiriirka labada dal, xaaladda Suudaan iyo xasilloonida guud ee gobolka Geeska Afrika.

June 8, 2026

2 daqiiqo akhris

Waxaa qoray Asha Elmi - Reporter

Qaahira (Dawan) – Madaxweynaha Masar Cabdifataax Al-Siisi iyo Madaxweynaha Eritrea Isaias Afwerki ayaa magaalada Qaahira ku yeeshay wadahadallo muhiim ah oo diiradda lagu saaray Geeska Afrika, amniga Badda Cas iyo xaaladaha siyaasadeed ee gobolka, sida ay sheegtay Madaxtooyada Masar.

Al-Siisi ayaa Madaxweynaha Eritrea ku qaabilay Qasriga Al-Ittihadiya, halkaas oo ay ku yeesheen wadahadallo ballaaran oo ay ka qeyb galeen wafdiyada labada dhinac.

Wadahadallada ayaa xoogga lagu saaray xoojinta xiriirka labada dal, gaar ahaan iskaashiga ganacsiga, dhaqaalaha iyo maalgashiga.

Al-Siisi ayaa mar kale xaqiijiyay taageerada Masar ee madax-bannaanida iyo midnimada dhuleed ee Eritrea, halka Madaxweyne Afwerki uu dhankiisa bogaadiyay taageerada Masar ee dadaallada horumarineed ee dalkiisa.

Maqaallo la xidhiidha

3 saac kahor

Booliska Banaadir oo sheegay in hub culus laga helay Elite Hotel

10 saac kahor

Jabuuti oo hirgelisay barnaamij lagula soconayo xaaladda carruurta qaba Macaanka

Labada madaxweyne ayaa si gaar ah uga wada hadlay xaaladda Geeska Afrika, iyadoo Al-Siisi uu carrabka ku adkeeyay in xasilloonida gobolka ay si toos ah ula xiriirto amniga qaranka Masar, isla markaana loo baahan yahay iskaashi dhow oo u dhexeeya dalalka gobolka.

Sidoo kale, waxaa diiradda lagu saaray xaaladda Suudaan, iyadoo Masar ay ku celisay mowqifkeeda ku aaddan taageerada midnimada, madax-bannaanida, amniga iyo xasilloonida dalkaas.

Dhanka amniga Badda Cas, labada hoggaamiye ayaa ka hadlay muhiimadda iskaashi lagu sugayo amniga maraakiibta iyo xasilloonida marin-biyoodka istiraatiijiga ah. Al-Siisi ayaa sheegay in dalalka ku teedsan Badda Cas ay mas’uul ka yihiin sugidda amniga iyo maamulka biyahaas.

Ugu dambeyn, labada dhinac ayaa isku raacay in la sii xoojiyo wada-tashiga iyo iskaashiga ku aaddan nabadda, xasilloonida iyo horumarka gobolka Geeska Afrika.

Maqaallo kale oo aan kuu doorannay

11 saac kahor