Muqdisho (Dawan)– Soomaaliya waxay ka gudubtay xilligii kala-guurka, waxayna hadda si buuxda gacanta ugu haysaa arrimaheeda, sida uu maanta oo Isniin ah sheegay Ra’iisul Wasaare ku-xigeenka Saalax Axmed Jaamac, oo ka hadlay xaflad ay Qaramada Midoobay ku soo xiraysay hawlgalkeeda siyaasadda ee dalka.
Saalax ayaa ku tilmaamay “maalin taariikhi ah,” isagoo sheegay in soo gabagabeynta hawlgalku ay muujinayso in Soomaaliya ay noqotay dal dastuuri ah oo federaal ah, kuna dhaqma hannaanka dimuqraadiyadda, gacantana ku haya inta badan amnigiisa.
“Xafladani waxay tilmaan u tahay in Soomaaliya ay ka baxday xilligii kala-guurka iyo qodobadii adkaa, oo ay tahay dal leh arrimihiisa, masiirkiisa iyo dowladnimadiisa, madax-bannaan, isaguna talladiisa leh,” ayuu Saalax u sheegay warbaahinta. Wuxuu sheegay in Soomaaliya hadda ay tahay dal dastuurka isku xukuma, nidaam federaal ah raaca, higsanaya dimuqraadiyad talada dadka u celinaysa, guud ahaanna inta badan amnigiisa gacanta ku haya.
Saalax ayaa sheegay in Qaramada Midoobay ay Soomaaliya kula yeelan doonto xiriir la mid ah kan ay la leedahay dal kasta oo caadi ah, iyadoo labada dhinac ay ka wada shaqeyn doonaan horumarinta iyo arrimaha kale ee caalamka. Wuxuu isbarbardhigay xilligan iyo waqti Soomaaliya ay ahayd dal qadiyaddiisa had iyo jeer lagu soo bandhigo Golaha Ammaanka sidii dal xaalad adag ku jira, isagoo sheegay in waqtigaas adduunka la oran jiray xaaladda Soomaaliya ha loo gurmado.