Maxay tahay soo-jeedinta Bulshada Rayidka ee doorashada Golaha Shacabka?

Muqdisho (Dawan) – Dalladda Bulshada Rayidka Soomaaliyeed (SONSA) ayaa maanta oo Khamiis ah soo jeedisay hannaan doorasho ku-meel-gaar ah oo cod-bixiyeyaashu si toos ah ugu dooranayaan musharraxiinta u tartamaya kuraasta Golaha Shacabka, iyadoo doorashadu ka dhacaysa deegaan-doorashooyin ay dhinacyada siyaasadda ku heshiiyaan.

Bayaan ay soo saartay SONSA ayay ku sheegtay in hannaankan lagu hirgelin karo nidaam xisbiyo siyaasadeed, balse muwaadiniinta la siinayo awood ay si gaar ah ugu codeeyaan musharraxa kursiga baarlamaanka, halkii ay codkooda siin lahaayeen xisbi oo keliya.

Dalladdu waxay sheegtay in soo-jeedintan ay noqon karto hannaan dhexdhexaad ah oo lagu xallin karo muranka siyaasadeed ee ka taagan doorashooyinka dalka, isla markaana lagu xaqiijin karo matalaad loo dhan yahay iyo doorasho ay dadweynuhu kalsooni ku qabaan.

SONSA ayaa sidoo kale ku baaqday in dowlad-goboleedyadu door muuqda ku yeeshaan abaabulka iyo hirgelinta doorashada, gaar ahaan isku-dubbaridka howlaha doorashada iyo sugidda amniga goobaha codbixinta.

Waxay sidoo kale dalbatay in la dhiso hannaan madax-bannaan oo lagu xalliyo cabashooyinka iyo khilaafaadka doorashada, iyadoo la adkeynayo daahfurnaanta diiwaangelinta cod-bixiyeyaasha, qabashada codbixinta, tirinta codadka iyo ku dhawaaqista natiijooyinka.

Dalladda ayaa ku talisay in heshiis siyaasadeed laga gaaro qoondada haweenka iyo matalaadda qaybaha bulshada ee aan si weyn uga dhex muuqan siyaasadda, iyadoo sidoo kale soo jeedisay tallaabooyin lagu xaqiijinayo matalaadda dadka naafada ah.

Soo-jeedinta SONSA ayaa ku soo beegantay iyadoo ay hore 8-dii Luulyo Golaha Midnimada Qaranka Soomaaliyeed, oo uu hoggaamiyo Ra’iisul Wasaarihii hore Cumar Cabdirashiid Cali Sharmaarke, u soo bandhigay qorshe la mid ah oo dhigaya in xubnaha Golaha Shacabka ay cod-bixiyeyaashu si toos ah uga soo doortaan deegaan-doorashooyin kala duwan, halka musharraxiintuna ay ku tartamayaan nidaam xisbiyo siyaasadeed.

Gabagabadii, SONSA waxay ugu baaqday Dowladda Federaalka Soomaaliya, dowlad-goboleedyada, mucaaradka iyo dhammaan daneeyayaasha siyaasadda inay gaaraan heshiis doorasho oo loo dhan yahay, si looga fogaado khilaaf siyaasadeed loona xaqiijiyo hannaan doorasho oo bulshada inteeda badan ay kalsooni ku qabto.