Jabuuti (Dawan) – Urur-goboleedka IGAD ayaa walaac xooggan ka muujiyay rabshadaha iyo xiisadaha siyaasadeed ee ka taagan Soomaaliya, gaar ahaan kuwa ka dhacay magaalada Muqdisho, isagoo ugu baaqay dhammaan dhinacyada inay ka fogaadaan tallaabooyin sii hurin kara xaaladda.
Bayaan uu ururku soo saaray maanta oo Khamiis ah ayaa lagu sheegay in IGAD ay si dhow ula socoto xaaladda Soomaaliya, isla markaana ay ka xun tahay rabshadaha dhacay iyo saamaynta ay ku yeesheen amniga iyo xasilloonida dalka.
Ururku wuxuu cambaareeyay dhammaan falalka rabshadaha ah, wuxuuna ugu baaqay daneeyayaasha siyaasadda Soomaaliya inay muujiyaan is-xakameyn, yareeyaan xiisadaha, islamarkaana khilaafaadkooda ku xalliyaan wadahadal iyo is-afgarad.
Xoghayaha Fulinta ee IGAD, Dr. Workneh Gebeyehu, ayaa sheegay in ilaalinta nabadda, xasilloonida iyo midnimada Soomaaliya ay tahay mudnaanta ugu weyn xilligan.
