Soomaaliya, 22 Noofambar 2025 — Dowladda Federaalka Soomaaliya ayaa shaacisay inay diyaar u tahay inay la wadaagto maamul-goboleedyada, gaar ahaan Somaliland, dakhliga ka soo xarooda nidaamka cusub ee fiisaha elektarooniga ah (e-Visa), iyadoo si cad u sheegtay in maamulka socdaalka iyo siyaasadda fiisuhu yihiin awood qaran oo aan la kala lahayn.
Wasiir-dawlaha Arrimaha Dibadda, Cali Maxamed Cumar (Bal’ad), oo ka hadlayay wareysi uu siiyay Miizaan Podcast oo ay baahiso Dawan, ayaa sheegay in nidaamka e-Visa-da uu qayb ka yahay dadaallada dowladda ee lagu casriyeynayo adeegyada, lagu kordhinayo hufnaanta, laguna mideynayo nidaamka ururinta dakhliga.
Wuxuu tilmaamay in ujeeddada looga guuray nidaamkii hore ee fiisaha lagu bixin jiray marka la yimaado garoonka, loona wareegay nidaam dhijitaal ah, ay tahay in lagu xalliyo habacsanaanta, lagu yareeyo musuqmaasuqa, laguna waafajiyo Soomaaliya heerarka caalamiga ah.
Bal’ad isagoo ka jawaabaya dhaliilaha jira ayaa yiri:
“Tani ma aha tallaabo loo sameeyay cid gaar ah, balse waa isbeddel muddo dheer socday oo lagu hubinayo in dakhliga si mideysan oo hufan loo ururiyo.”