Baydhabo (Dawan) – Laba murashax oo ka mid ah musharraxiinta u taagan xilka Madaxweynaha Dowlad-goboleedka Koonfur Galbeed ayaa ku baaqay in la ilaaliyo hufnaanta, caddaaladda iyo madaxbannaanida hannaanka doorashada madaxtinnimada ee la qorsheeyay in ay dhacdo 10-ka Juun.
Murashaxiinta kala ah Shariif Xasan Sheekh Aadan iyo Cabdicaasiis Maxamed Sheekh Cismaan (Jawaari) ayaa war-saxaafadeed ay soo saareen ku muujiyay cabasho ay ka qabaan hannaanka doorashada, iyagoo ku baaqay in dowladda Federaalka, ururrada bulshada rayidka ah, odayaasha dhaqanka, dhammaan indheer-garadka Soomaaliyeed iyo beesha caalamka ay si dhow ula socdaan geeddi-socodka doorashada.
Waxay sidoo kale sheegeen in ay jiraan, sida ay hadalka u dhigeen, dadaallo lagu doonayo in lagu “burburiyo xorriyadda codbixinta” laguna beddelo nidaamka cod qarsoodiga ah hannaan ay ku tilmaameen mid ku saleysan cadaadis iyo dabagal, taas oo ay ka digeen in ay dhaawici karto madaxbannaanida xildhibaannada iyo kalsoonida natiijada doorashada.