Muqdisho (Dawan)– Golaha Mustaqbalka Soomaaliyeed ayaa dalalka ciidamada ku deeqay Hawlgalka Midowga Afrika ee Taageerada iyo Xasillinta Soomaaliya (AUSSOM) ka codsaday inay taageeraan heshiis siyaasadeed oo loo dhan yahay, kaas oo saldhig u noqda kala-guurka amniga iyo dib-u-dhiska hay’adaha dowladeed ee Soomaaliya.
Goluhu ayaa baaqan ku sheegay warqad furan oo ay soo saareen maanta oo ah 27-ka Luulyo 2026, taas oo loo kala diray madaxda dalalka Uganda, Kenya, Itoobiya, Jabuuti, Burundi iyo Masar, kuwaas oo ka mid ah dalalka ay ciidamada militeriga ah iyo booliska ku taageera hawlgalka AUSSOM.
Warqadda, Golaha Mustaqbalka Soomaaliyeed wuxuu madaxda dalalka ciidamada AUSSOM ugu baaqay inay shirka Kampala u adeegsadaan dhiirrigelinta wada-hadal iyo heshiis siyaasadeed oo Soomaaliyeed, isaga oo sheegay in xalka siyaasadeed uu yahay shardi muhiim u ah sii socoshada taageerada amni ee caalamka.
Goluhu wuxuu ku sheegay warqaddiisa in Soomaaliya ay wajahayso xaalad siyaasadeed oo halis ah, wuxuuna ku dooday inaan weli la gaarin heshiis siyaasadeed oo lagu maareeyo marxaladda kala-guurka iyo dib-u-cusboonaysiinta hay’adaha dastuuriga ah.
