Puntland (Dawan) – Ciidamada Ammaanka Puntland ayaa sheegay inay maanta hawlgal amni oo qorshaysnaa ka fuliyeen deegaanka Laag, kaas oo ay sheegeen in lagu soo afjaray koox hubaysan oo ay ku eedeeyen in muddooyinkii u dambeeyay ay wadday falal amni-darro iyo qalqal-gelin.
Sida lagu sheegay war uu baahiyay Telefishinka Puntland, ciidamada ayaa intii uu socday hawlgalka ku qabtay gaadiid ciidan, hub noocyo kala duwan leh iyo tiro maxaabiis ah.
Maamulka Puntland ayaa sidoo kale sheegay in ay socdaan hawlgallo lagu baadi-goobayo xubno ka tirsan kooxda oo goobta ka baxsaday, iyadoo ciidamada ammaanku ay sii wadaan dadaallada lagu xaqiijinayo amniga iyo xasilloonida deegaanka.
Puntland si gaar ah uma magacaabin kooxda hubaysan ee ay ku tilmaantay inay khatar ku tahay amnigeeda, sidoo kalena ma aysan caddeyn halka ay salka ku hayso kooxdaasi iyo cidda ay hoos tagto.
