Muqdisho (Dawan)- Xafiiska Qaramada Midoobay ee isku xirka arrimaha bini’aadantinimada ee OCHA oo warbixin kaso saaray xaaladdii ugu dambeysay ee roobka ka da'aya qeybo badan oo Soomaaliya ah ayaa sheegay in, in ka badan 1.17 milyan oo qof ay saameeyn kasoo gaaratay daadadkii iyo fatahaadihii ka dhashay roobka.
Warbxintu waxa ay tilmaantay in isbuucyadii lasoo dhaafay ay da'een roobab mahiigaan ah oo ka badan xaddigii la saadaalinayay bilaha October ilaa December, iyaga oo geystay khasaare isagu jira dhimasho iyo barakac baahasan.
Sida lagu sheegay warbixinta, waxaa ku geeriyooday roobabka ilaa 28 ruux oo ay ku jiraan 8 carrrur ah in kasta oo ay Hay’adda Maareynta Musiiboyinka Qaranka Soomaaliyed hore u shaacisay dhimashada 29 qof.
OCHA waxa ay sidoo kale ku sheegtay warbixinteeda in 334,800 oo qof ay ka barakaceen guryahoodii, halka 2,400 oo qof laga soo daad gureeyay goobihii ay ku go'doonsanaayeen.
Gobollada Gedo, Bay, Bakool, Jubbada Dhexe, iyo Hiirraan ayaa ah goobaha ugu badan oo ay ka da'een roobabkii ugu dambeeyay.
Ku dhawaad nus malyuun ka mid ah dadka uu roobku saameynta ku yeeshay ayaa ku nool Maamul Goboleedka Koonfur Galbeed.
Jubaland, waxaa dhibaato soo gaaratay In ka badan 310,000 oo qof, halka tirada dadka kaalmada u baahan ee Puntland iyo Galmudug ay kala yihiin 201,000 iyo 145,800, sida ay u kala horeeyaan.