Muqdisho (Dawan) – Qaramada Midoobay ayaa walaac xooggan ka muujisay dagaalladii iyo rabshadihii xalay ka dhacay magaalada Muqdisho, iyadoo uga digtay dhinacyada isku haya khilaafka siyaasadeed inay dalka dib ugu celiyaan xaaladdii cakirnayd ee ka dhalatay murankii doorashooyinka sanadkii 2021.
Qoraal uu soo saaray Xafiiska Qaramada Midoobay ee Soomaaliya (UNTMIS) ayaa lagu sheegay in hay’addu si dhow ula socoto xaaladda Muqdisho, isla markaana ay aad uga walaacsan tahay iska horimaadyada ka dhacay caasimadda xilli ay sii xoogeysanayaan murannada siyaasadeed ee la xiriira doorashooyinka.
“Waxaan ugu baaqeynaa dhammaan dhinacyada inay joojiyaan colaadda, kana fogaadaan tallaabooyin dheeraad ah oo khatar gelin kara nolosha rayidka, isla markaana ay dib ugu laabtaan wada-hadalka dani ugu jirto dhammaan Soomaalida,” ayaa lagu yiri bayaanka.
Qaramada Midoobay ayaa xustay in iyada iyo saaxiibada caalamiga ah ay marar badan ka digeen khatarta ka dhalan karta in Soomaaliya dib ugu noqoto qalalaasihii siyaasadeed iyo amni ee ka dhashay khilaafkii doorashooyinka sanadkii 2021.
“Waxaan marar badan uga dignay khatarta soo noqoshada qalalaasihii ka dhashay khilaafkii doorashooyinka ee 2021, hase yeeshee digniinahaasi nasiib darro lama tixgelin,” ayaa lagu yiri bayaanka.