New York Dawan) — Golaha Guud ee Qaramada Midoobay ayaa Jimcihii taageeray qaraar looga golleeyahay in lagu saxo qallooca ku jira khariidadaha dunida ee sida weyn loo isticmaalo, gaar ahaan khariidadda Mercator-ka, oo taageerayaasha qaraarka ay sheegeen in ay si khaldan u muujiso cabbirka qaaradaha, isla markaana ay saameyn ku yeelato sida loo arko baaxadda Afrika.
Qaraarka oo cinwaankiisu yahay “Sax khariidadda: dib-u-dheellitirka matalaadda khariidadaha dunida iyo dhiirrigelinta matalaad loo siman yahay oo gobollada dunida ah, gaar ahaan Afrika”, ayaa lagu ansixiyay 164 cod oo oggol ah, hal cod oo diidmo ah iyo lix dal oo ka aamusay.
Maraykanka ayaa ka codeeyay qaraarka, halka Estonia, Georgia, Lithuania, Moldova, Serbia iyo Ukraine ay ka aamuseen, sida ay sheegtay Qaramada Midoobay.
Qaraarku wuxuu ku baaqayaa in si ballaaran loo isticmaalo khariidadaha loo yaqaan equal-area projections, gaar ahaan Equal Earth, marka laga hadlayo xaaladaha ay muhiim tahay in si sax ah loo muujiyo isbarbardhigga cabbirka qaaradaha.
Dowladaha taageeraya qaraarka, oo ay hormuud ka yihiin dalalka Afrika, ayaa sheegay in khariidadaha qalloocan ee lagu isticmaalo buugaagta waxbarashada, warbaahinta, baraha internetka iyo dukumiintiyada rasmiga ah ay saameyn karaan waxbarashada, fahamka dadweynaha iyo sida loo qiimeeyo baaxadda iyo awoodda Afrika.
Wakiilka Togo oo qaraarka ku soo bandhigay magaca dalalka Afrika ayaa sheegay in khariidado sax ah ay qayb ka yihiin dadaallada lagu wajahayo dheellitir la’aanta taariikheed ee ku jirta sida dunida loo matalo.
