Addis Ababa, (Dawan ) – Wafdi isku dhaf ah oo ka socday Bangiga Adduunka, hay’adda horumarinta Jarmalka ee KfW, iyo Wasaaradda Beeraha ee Itoobiya ayaa qiimeyn ku sameeyay natiijooyinka laga gaaray Barnaamijka Shabakadda Wax-soo-saarka (PSNP-5), kaasoo hadda maraya gabagabada.
Wafdiga ayaa kulan la qaatay masuuliyiinta xafiisyada beeraha, maaliyadda, iyo arrimaha bulshada ee deegaanka, sidoo kale hawlwadeennada mashruuca, halkaas oo lagu soo bandhigay warbixin ku saabsan hawlaha uu barnaamijku qabtay intii lagu guda jiray wejigiisa shanaad.
Kadib kulamada, wafdiga ayaa booqday mashaariic uu barnaamijka PSNP-5 ka hirgeliyay degmada Gursum ee gobolka Faafan, kuwaas oo isugu jira dib-u-soo nooleynta dhulka beeralayda, horumarinta hab nololeedka bulshada, iyo taageero dhaqaale oo la siiyay dadka deegaanka si ay u bilaabaan ganacsiyo yaryar ama u horumariyaan beerahooda.
Bedelkeena Diid Maxamed, Agaasimaha Waaxda Horumarinta Kheyraadka Dabiiciga ah ee Xafiiska Beeraha Dowlad Deegaanka Soomaalida, ayaa sheegay in ujeeddada booqashada wafdigan ay tahay qiimeynta natiijooyinka PSNP-5 iyo diyaarinta wejiga xiga ee barnaamijka.
