New York (Dawan) – Iyadoo maalmo yar ay ka harsan yihiin furitaanka Koobka Adduunka 2026 ee lagu qabanayo Mareykanka, Mexico iyo Canada, ayay shirkadda caanka ah ee tirakoobyada ciyaaraha ee Opta ay soo saartay qiimeyn ay ku samaysay sida ay u kal awood badan yihiin Group-yada koobka adduunka 2026.
Tartankan oo markii ugu horreysay ay ka qaybgelayaan 48 xul qaran ayaa loo qaybiyey 12 guruub, iyadoo 32 xul ay u gudbi doonaan wareegyada bug-baxa halka 16 xul ay ku harayaan heerka guruubyada.
Sida lagu sheegay qiimeynta Opta, Group I ayaa noqday guruubka ugu adag tartanka, iyadoo celceliska awoodda xulalka ku jira lagu qiyaasay 81.8 dhibcood. Guruubkan waxaa ku wada jira Faransiiska, Senegal, Norway iyo Ciraaq.
Faransiiska ayaa ah xulka labaad ee ugu xooggan dunida marka loo eego qiimeynta Opta, halka Senegal iyo Norway ay sidoo kale ka mid yihiin 25-ka xul ee ugu sarreeya qiimeynta caalamiga ah. Ciraaq, oo ku jirta kaalinta 62-aad, ayaa loo arkaa xul samayn kara mucjiso, kadib markii uu barbaro la galay Spain ciyaar saaxiibtinimo oo dhawaan dhacday.
Dhanka kale, Group K ayaa galay kaalinta labaad ee guruubyada ugu adag, iyadoo ay ku mideysan yihiin Colombia iyo Portugal, kuwaas oo labaduba ka tirsan tobanka xul ee ugu sarreeya qiimeynta Opta. Celceliska awoodda guruubkan ayaa gaartay 81 dhibcood.
Warbixinta ayaa sidoo kale tilmaantay in Group D uu yahay guruubka ugu dheellitiran tartanka. Guruubkan waxaa ku wada jira Mareykanka, Turkiga, Australia iyo Paraguay, kuwaas oo dhammaantood ku jira 36-ka xul ee ugu sarreeya qiimeynta. Farqiga u dhexeeya xulka ugu sarreeya iyo kan ugu hooseeya guruubkan waa 6.5 dhibcood oo keliya, taasoo ka dhigaysa midka ugu tartanka badan.
Qiimeynta Opta waxay muujineysa in fursadaha afarta xul ee guruubkan ay aad isugu dhow yihiin, inkastoo Mareykanka loo saadaaliyay inuu kaalinta koowaad ku soo baxo.
Dhanka kale, Group B ayaa loo aqoonsaday guruubka ugu fudud tartanka. Guruubkan waxaa ku jira Canada, Switzerland, Bosnia iyo Herzegovina iyo Qatar.
Sidoo kale, Group A ayaa ka mid noqday guruubyada ugu daciifsan, maadaama aanu ku jirin hal xul oo ka tirsan 20-ka ugu sarreeya dunida. Guruubkan waxaa ku jira Mexico, Kuuriyada Koonfureed, Czech Republic iyo Koonfur Afrika.
Warbixintu waxay sidoo kale xustay farqiyo waaweyn oo ka jira kooxaha qaarkood. Group C, oo ay ku jiraan Brazil iyo Haiti, ayaa leh farqi ka badan 35 dhibcood oo u dhexeeya xulka ugu xooggan iyo kan ugu hooseeya. Halka Group E, oo ay ku wada jiraan Germany iyo Curaçao, uu leeyahay farqiga ugu weyn ee tartanka oo ka badan 40 dhibcood.
Inkasta oo qiimeyntani ay bixineyso sawir guud oo ku saabsan awoodda xulalka, Opta waxay xustay in taariikhda Koobka Adduunka ay marar badan muujisay in saadaasha iyo xaqiiqadu in aysan mar walba is waafaqin, taasoo ka dhigaysa in natiijada kama dambaysta ah lagu kala baxo gudaha garoonka.
Qiimeynta awoodda Group-yada ee Opta
