Muqdisho (Dawan)– Rugta Ganacsiga iyo Warshadaha Soomaaliyeed ayaa maanta oo Khamiis ah diidmo ka muujisay go’aanka dowladda federaalka Soomaaliya ay ku magacowday guddoomiye ku-meel-gaar ah oo hoggaamiya rugta, iyadoo sheegtay in doorashada hoggaankeeda ay tahay inay sameeyaan bahda ganacsiga ee dalka.
Rugta Ganacsiga iyo Warshadaha Soomaaliyeed ayaa qoraal jawaab ah oo ay u dirtay Ra’iisul Wasaaraha Xukuumadda Federaalka Soomaaliya, Xamsa Cabdi Barre, iyo Wasiirka Ganacsiga, ku sheegtay in magacaabista guddoomiyaha ku-meel-gaarka ah ay ka hor imaanayso sharciyada iyo xeer-hoosaadka lagu maamulo hay’adda, isla markaana ay wax u dhimayso madax-bannaanideeda oo ay ku matasho qaybta gaarka loo leeyahay.
Rugta ayaa sheegtay in guddoomiyaha iyo guddiga maamulka lagu soo dooranayo hannaan doorasho oo ay ka qayb qaataan ganacsatada Soomaaliyeed iyo rugaha ganacsiga ee gobollada dalka, halkii lagu magacaabi lahaa go’aan toos ah oo ka yimaada dowladda.
Waxay sidoo kale caddeysay in aysan aqoonsan doonin guddoomiye ama maamul aan lagu soo dooran habraac doorasho oo gudaha ah, kaas oo ay hormuud ka yihiin xubnaha iyo bahda ganacsiga Soomaaliyeed.
