Nairobi (Dawan) – Safaaradda Jamhuuriyadda Federaalka Soomaaliya ee dalka Kenya ayaa xoojisay dadaallada lagu yareynayo caqabadaha ay ardayda Soomaaliyeed kala kulmaan helitaanka waxbarashada heerarka kala duwan ee jaamacadaha Kenya, iyadoo mudnaanta la siinayo xal u helidda arrimaha la xiriira aqoonsiga iyo isu-ekeysiinta shahaadooyinka.
Sida ay sheegtay safaaraddu, waxaa si joogto ah looga shaqeynayaa sidii meesha looga saari lahaa caqabadihii muddooyinkii dambe saameeyay aqoonsiga shahaadooyinka, si ardayda Soomaaliyeed ay u helaan fursado waxbarasho oo siman.
Danjiraha Soomaaliya ee Kenya, Jabriil Ibraahim Cabdulle, oo hormuud u ah dadaalladan, ayaa sheegay in safaaraddu ay xoogga saarayso sidii arday kasta oo Soomaaliyeed uu u heli lahaa fursad waxbarasho oo ku dhisan caddaalad iyo hufnaan, iyadoo la xallinayo dhammaan caqabadaha la xiriira aqoonsiga shahaadooyinka.
