Abuja (Dawan) – Safiirka cusub ee Jamhuuriyadda Federaalka Soomaaliya u magacowday dalka Nigeria, Maxamed Cusmaan Maxamed, ayaa si rasmi ah waraaqihiisa aqoonsiga ugu gudbiyay Madaxweynaha Nigeria, Bola Ahmed Tinubu, sida ay shaacisay Safaaradda Soomaaliya ee Abuja.
Munaasabadda gudbinta waraaqaha aqoonsiga oo ka dhacday magaalada Abuja Khamiistii, ayaa Madaxweynaha Nigeria ku qaabbilay safiirka, isaga oo muujiyay sida ay uga go’an tahay dowladdiisu xoojinta xiriirka laba geesoodka ah ee kala dhexeeya Soomaaliya, sida lagu sheegay qoraal ka soo baxay safaaradda.
Madaxweynaha ayaa carrabka ku adkeeyay muhiimadda ay leedahay in la ballaariyo iskaashiga dhinacyada kala duwan, gaar ahaan ganacsiga, amniga, horumarka waara iyo is-dhaafsiga hiddaha iyo dhaqanka.
Dhankiisa, Safiir Maxamed Cusmaan Maxamed ayaa sheegay in Soomaaliya ay ka go’an tahay xoojinta iyo qoto-dheeraynta xiriirka ay la leedahay Nigeria, iyo horumarinta iskaashiga u dhexeeya labada dal.