Jabuuti, 12 Oktoobar 2025 — Salaam Bank ayaa bilaabay dhismaha 20 goobood oo ganacsi ah oo cusub oo laga hirgelinayo gobolka Cali-Sabieh, si loo xoojiyo ganacsiga koonfurta Jabuuti.
Mashruucan ayaa si rasmi ah lagu daahfuray xaflad dhagax-dhigis ah oo la qabtay Khamiistii, sida uu sheegay Wakaaladda Wararka Jabuuti.
Xafladda waxaa ka soo qaybgalay mas’uuliyiin ka socday Wasaaradda Dawladaha Hoose ee Jabuuti, Guddoomiyaha Gobolka Cali-Sabieh Cabdulmaalik Maxamed Banoita, Guddoomiyaha Maamul Goboleedka Sharmaarke Xasan Allaleh, iyo Maareeyaha Guud ee Salaam Bank Jaamac Xirsi Cabdi.
Mashruucan ayaa qayb ka ah istaraatiijiyad ballaaran oo lagu xoojinayo dhaqaalaha deegaanka iyadoo la taageerayo ganacsiyada yaryar iyo fursadaha ganacsi ee heer bulsho.
Sharmaarke Xasan Allaleh, Guddoomiyaha Maamul Goboleedka Cali-Sabieh, ayaa sheegay in mashruucan uu yahay iskaashi ka dhexeeya gobolka iyo Salaam Bank.
“Waxaan go’aansannay inaan Cali-Sabieh siino hanti joogto ah oo faa’iido u yeelan doonta mustaqbalka. Tani waa qayb ka mid ah siyaasadda Jabuuti ee hadda la hirgeliyey. Salaam Bank ayaa nagu garab istaagay dadaalkan,” ayuu yiri.
