Muqdisho (Dawan) – Madaxweynihii hore ee Soomaaliya, Shariif Sheekh Axmed, ayaa sheegay in Soomaaliya aysan weli ku jirin xaalad u saamaxaysa qabashada doorasho qof iyo cod ah, isagoo xusay in arrintaasi u baahan tahay diyaar-garow ballaaran iyo heshiis siyaasadeed oo ay ku mideysan yihiin dhinacyada kala duwan ee dalka.
Shariif Sheekh Axmed ayaa tilmaamay in inkastoo himilada Soomaaliya ay tahay in la gaaro doorasho qof iyo cod ah, haddana ay jiraan caqabado amni, siyaasadeed iyo farsamo oo weli taagan, kuwaas oo u baahan in marka hore wax laga qabto.
“Qof iyo cod waa meesha loo socdo, waa yoolka la rabo in la gaaro, laakiin waxay u baahan tahay howl fara badan oo amni iyo siyaasad ku saabsan, in axsaabta ay meel walba tegi karaan, in dalka uu xor ka yahay argagixisada, iyo in kalsooni ay ka dhex jirto bulshada,” ayuu yiri Shariif Sheekh Axmed.
Madaxweynihii hore ayaa sheegay in dowladnimada Soomaaliya ay soo martay marxalado kala duwan, balse xaaladda hadda jirta ay u baahan tahay in si wadajir ah looga heshiiyo nooca doorasho ee la qabanayo iyo habka loo wajahayo geeddi-socodka doorashooyinka.
