Jabuuti (Dawan) – Jabuuti ayaa hawlgelisay guddi ay ku mideysan yihiin wasaarado kala duwan si ay isugu dubbaridaan jawaabta dowladda ee saameynta dhaqaale ee ka dhalatay xiisadaha Bariga Dhexe, sida ay Axaddii sheegtay Wakaaladda Wararka Jabuuti ee ADI.
Guddigan oo uu guddoominayo Ra’iisul Wasaaraha Jabuuti, Cabdulqaadir Kaamil Maxamed, ayaa ka kooban wasaarado muhiim ah iyo hay’ado dowladeed, kuwaas oo la socon doona xaaladda isla markaana soo jeedin doona tallaabooyin lagu yareynayo saameynta ay ku yeelan karto dhaqaalaha dalka.
ADI ayaa sheegtay in guddigu uu qiimeyn doono khataraha ku wajahan sahayda badeecadaha daruuriga ah, la socon doono qiimaha suuqyada iyo sicir-bararka, isla markaana kormeeri doono qorshayaasha gurmadka si loo hubiyo in dekedaha dalka ay sii wadaan soo dejinta badeecadaha istaraatiijiga ah.
