Soomaaliya (Dawan)- — Wasiirka Warfaafinta Soomaaliya, Daa’uud Aweys, ayaa sheegay in dowladda Federaalka Soomaaliya ay qaadayso tallaabooyin diblomaasiyadeed oo xooggan oo ka dhan ah go’aanka Israa’iil ee la xiriira safiirka ay Israa'iil u magacaawday “Somaliland”, isagoo ku tilmaamay tallaabadaas “xadgudub cusub” oo ka dhan ah madaxbannaanida iyo midnimada dhuleed ee Soomaaliya.
Wareysi gaar ah oo uu siiyay Aljazeera, ayuu wasiirku ku sheegay in Soomaaliya ay si cad u diiday go’aankaas, isagoo yiri: “Soomaaliya waa dal mid ah oo madax-bannaan, mana lagu xad gudbi karo wadajirka dhulkeeda.”
Wuxuu intaa ku daray in jawaabta dowladda ay tahay mid ku saleysan waddooyinka diblomaasiyadeed, isla markaana arrintan si rasmi ah loogu gudbiyay beesha caalamka. Wasiirku wuxuu sheegay in dadaalladaasi ay socdeen tan iyo dhammaadkii December, xilligii Israa’iil ay aqoonsatay Somaliland, isagoo xusay in: “Waxaan weli ku tiirsannahay kanaallada diblomaasiyadda si aan u xaqiijino in arrintan aysan sii soconin.”
Soomaaliya ayaa sidoo kale sheegtay inay heshay taageero caalami ah oo ballaaran, oo ay ku jiraan Qaramada Midoobay, Midowga Afrika iyo Jaamacadda Carabta, iyo dalal Islaami ah oo dhowr ah, kuwaas oo dhammaantood la wadaaga mowqifka Muqdisho ee ilaalinta midnimada dalka.
