Nairobi (Dawan)- Wasiirka Caafimaadka Kenya, Aadan Barre Ducaale, ayaa ugu baaqay bulshada ku nool deegaannada ka tisan Gaarisa, Tana River iyo Kitui inay qaataan go'aan nabadeed oo ay ku wada noolaadaan, si loo soo afjaro colaadaha soo noqnoqda ee muddo dheer ka taagnaa xuduudaha isku xira seddexda dhinac.
Ducaale ayaa sheegay in dagaallada iyo iska horimaadyada ka dhaca aagaggaasi ay salka ku hayaan loollanka loogu jiro kheyraadka dabiiciga ah ee xaddidan, gaar ahaan biyaha iyo daaqa.
Ducaale ayaa hadalladan ka jeediyay munaasabad lacag ururin ah oo loogu talagalay Madarasadaha Daarulxikma iyo Taqwa ee tuulada Daarulxikma ee deegaanka Bura.
“Nabad la’aan awgeed hooyooyinkeennu ganacsigooda ma qabsan karaan. Nabad la’aan awgeed dadku ma aadi karaan masaajidda ama kaniisadaha. Nabad la’aan awgeed waddooyinku way xirmayaan, gaadiidkuna wuu curyaami doonaa,” ayuu yiri Ducaale.
Wuxuu ku boorriyay shacabka Tana River inay ilaashadaan xasilloonida, isagoo sheegay in bulshada deriska ahi ay ku xiran yihiin juqraafi ahaan iyo taariikh ahaan.
