Hargeysa (Dawan) — Somaliland ayaa diyaar u ah inay ilaa 2,000 askari ku biiriso ciidamada caalamiga ah ee loo qorsheeyay xasilinta Gaza, haddii laga codsado, sida uu sheegay Madaxweynaha Somaliland Cabdiraxmaan Maxamed Cabdullaahi, sida ay qortay i24NEWS Khamiitan.
Madaxweynaha ayaa hadalkan sheegay isaga oo ka qaybgalaya shirka MEAD, isagoo xusay in Somaliland aysan si iskeed ah u dalbanayn inay ciidamo dirto, balse ay diyaar tahay haddii laga codsado.
“Haddii nala weydiisto, ciidamo waan bixin karnaa,” ayuu yiri madaxweynaha, sida ay werisay i24NEWS. “Annagu iskaa uma soo bandhigeyno, laakiin haddii la i weydiisto, waan diyaar ahay.”
Sida ay sheegtay i24NEWS, ciidamada xasilinta ee la qorsheeyay ayaa la filayaa inay ugu dambeyn gaaraan ku dhowaad 20,000 askari, waxaana hoggaamin doona Mareykanka.
Ciidamada ayaa loo qorsheeyay inay ka shaqeeyaan sugidda amniga Gaza, tababarka booliiska Falastiin, fududeynta gaarsiinta gargaarka bani’aadannimo iyo ka hortagga in Xamaas ay dib u dhisto awooddeeda militari.
Uganda ayaa horay u oggolaatay inay dirto ku dhowaad 1,200 askari, halka Morocco ay ballanqaadday ilaa 500 askari, sida ay qortay i24NEWS. Albania, Kazakhstan iyo Kosovo ayaa sidoo kale ballanqaaday inay ka qaybqaataan hawlgalka.
Cabdiraxmaan ayaa sheegay in Somaliland ay leedahay ku dhowaad 25,000 askari iyo 1,500 askari oo ka tirsan ilaalada xeebaha, sida ay werisay i24NEWS.
