Muqdisho (Dawan) — Shabakadda Cilmi-baarista iyo Waxbarashada Soomaaliya (SomaliREN) ayaa ku biirtay bulshada DataCite, iyadoo noqotay hoggaamiyaha dalladda isla markaana Soomaaliya ka hirgelisay Dalladdii Qaran ee ugu horreysay ee DataCite, tallaabadaas oo lagu xoojinayo kaabayaasha cilmi-baarista iyo cilmiga furan ee dalka. Dalladda cusub ayaa jaamacadaha iyo xarumaha cilmi-baarista Soomaaliya siin doonta hab ay si wadajir ah ugu heli karaan adeegyada DataCite, isla markaana cilmi-baaristooda ugu sameyn karaan aqoonsi dijitaal ah oo joogto ah, oo loo yaqaan DOI.
DOI waa aqoonsi gaar ah oo cilmi-baaris ama xog cilmiyeed lagu diiwaangeliyo, kaas oo fududeeya in cilmi-baarista laga raadiyo internet-ka, loo tixraaco, lana xiriiriyo cilmi-baaris kale.
SomaliREN ayaa sheegtay in dalladdu fududeyn doonto in DOI loo sameeyo in ka badan 30 nooc oo cilmi-baaris iyo xog cilmiyeed ah, oo ay ka mid yihiin qoraallada jaamacadaha, daraasadaha, xog-ururinta, maqaallada cilmiyeed, sawirrada iyo agabyo kale oo cilmi-baariseed. DataCite waxay isku xirtaa in ka badan 1,800 hay’adood oo ku kala sugan in ka badan 70 dal, iyadoo shabakaddeedu ay ka kooban tahay in ka badan 135 milyan oo cilmi-baaris iyo xog cilmiyeed.
“Dhisidda Dalladdan Qaran ee DataCite waxay ka badan tahay oo keliya helitaanka DOI-yada,” ayuu yiri Axmed Siyad, Madaxa Fulinta ee SomaliREN. Wuxuu sheegay in iskaashigu gacan ka geysan doono in cilmi-baarista ay sameeyaan aqoonyahannada Soomaaliyeed ay noqoto mid si fudud loo heli karo, loo aamini karo, isla markaana gaarta bulshada cilmiyeed ee caalamka.
Tallaabadan ayaa qayb ka ah dadaallada SomaliREN ay ku horumarinayso kaabayaasha cilmi-baarista Soomaaliya, oo ay ka mid yihiin kaydka dijitaalka ah ee jaamacadaha iyo xarumaha cilmi-baarista iyo waxbarashada.
