Muqdisho (Dawan)– Hay’adda Madaxa-bannaan ee Bulshada Rayidka Soomaaliya (SONSA) ayaa si adag uga digtay go’aanka Golaha Wasiirrada ee soo baxay 16-kii Luulyo 2026, kaas oo la xiriira magacaabista hoggaan ku-meel-gaar ah oo loo sameeyo Rugta Ganacsiga iyo Warshadaha Soomaaliyeed.
War-saxaafadeed ay soo saartay SONSA ayay ku sheegtay in Golaha Ganacsiga iyo Warshadaha Soomaaliyeed uu yahay hay’ad madax-bannaan oo aan dowlad ku xirnayn, isla markaana leh xeerar iyo habraacyo u gaar ah oo lagu maamulo laguna doorto hoggaankiisa. Hay’addu waxay sheegtay in faragelin toos ah oo dowladda ka timaadda ay khatar gelin karto madax-bannaanida Golaha, isla markaana ay abuuri karto khilaaf iyo kala qeybsanaan ka dhex dhalata bulshada ganacsiga Soomaaliyeed.
SONSA ayaa sidoo kale xustay in Dowladda Federaalka Soomaaliya ay sanadkii 2023 codsatay dib u dhigista doorashadii hoggaanka Golaha Ganacsiga, iyadoo markaas u baahnayd waqti dheeraad ah si ay uga qayb qaadato kormeerka habraaca doorashada.
“Magacaabista hoggaanka ku-meel-gaarka ah waqtigan waxay lid ku tahay heshiiskii hore, madax-bannaanida Golaha iyo mabaadi’da ay ku dhisan yihiin hay’adaha aan dowladdu maamulin,” ayaa lagu yiri war-saxaafadeedka.