Nairobi (Dawan)- Wasiirka Deegaanka iyo Isbedelka Cimilada Khadiija Maxamed Al-makhzoumi ayaa dhiggeeda dowladda Imaaraadka Carabta Mariam Almheiri kala hadashay iskaashiga labada dal ee arrimaha deegaanka iyo isbeddelka cimilada.
Labada wasiir ayaa ka qeyb gelaya shirka cimilada Afrika ee ka socda caasimadda Nairobi ee dalka Kenya.
Qoraal ay soo dhigtya barteeda X ayey wasiir Khadiija ku tiri “Waxaan ka wada hadalnay xiriirka laba geesoodka ah ee ka dhexeeya dalalkeenna iyo u diyaargarowga Imaaraadka ee martigelinta COP28 ".
Kenya ayaa martigelinaysa shirkii ugu horreeyay ee cimilada Afrika, kaas oo looga hadlayo u nuglaanshaha isbeddelka cimilada qaaradda Afrika iyo caalamka.
Shirkaan oo bilaawaday shalay oo isniin ah, waxaa ka qeyb gelaya madaxda Afrika, mas’uuliyiin ka socda hay’adaha caalamka iyo ergeyga gaarka ah ee madaxweynaha Maraykanka u qaabilsan arrimaha cimilada John Kerry, wuxuuna socon doona ilaa 6-da September.
Shirkaan ayaa laga soo saari doona Baaqa Nairobi oo wax looga qabnaayo isbeddelka cimilada si loo kordhiyo cagaarinta iyo maal gelinta dalalaka Afrika kuwaas oo wajahaya qataraha isbeddelka cimilada.
Midowga Afrika iyo saaxibada caalamka ayaa iska kaashanaya hirgelinta qorshahaan la rabo in looga hor tago saameynta isbeddelka cimilada, waxaana la abuuraya madal la isku dhaafsado argatiyada dalalka afrika iyo Beesha Caalamaka .
Kenya oo martigelinaysa shirka cimilada, ayaa ka mid ah wadamada Afrikaanka ah ee loo arko in ay horumar ka gaareen qorshaha looga hortegayo isbeddelka cimilada, waxaana weheliya Koonfur Afrika iyo Marooko.
Kenya waxay sannadkan u qoondaysay ilaa 12 milyan oo doolar oo loogu talagalay adeegyada saadaasha hawada, waxeyna dadaal ku bixisa caagrinta deegaanka iyo ilaalinta duur joogta.
Dowladda Soomaaliya ayaa daah furtay sannadkii hore qorshaha Qaran ee Soomaaliya cagaar ah, kaas oo ah in la beero 10 Malyan oo geed si loo dhireeyo dalka logana hor tago isbeddelka cimilada, sidoo kale Golaha Aqalka sare ayaa dhawaan meel mariyay xeerka ilaalinta iyo maareynta deegaanka oo wax badan ka tari doona arrimaha deegaanka.
Madaxda ayaa ka doodaya natiijada ka soo baxday ballan qaadyadii hore loo sameeyay, caqabadaha hortaagan wax ka qabashada isbeddelka cimilada iyo soo xoojinta dadaalada ay dalalku ku howlanyihiin si loo badbaadiyo qaaradda Afrika.
