Soomaaliya iyo Kenya oo ka wada hadlay xoojinta ganacsiga iyo maalgashiga

Addis Ababa (Dawan) — Soomaaliya iyo Kenya ayaa maanta ka wada hadlay sidii loo xoojin lahaa xiriirkooda ganacsi, loo fududeyn lahaa isu-socodka badeecadaha, loona ballaarin lahaa fursadaha maalgashi ee labada dal.

Wasiirka Ganacsiga iyo Warshadaha Soomaaliya, Amb. Jamaal Maxamed Xasan, ayaa kulan laba geesood ah la yeeshay Wasiirka Ganacsiga, Maalgashiga iyo Warshadaha Kenya, Lee Kinyanjui, iyadoo labada dhinac ay diiradda saareen sidii xiriirka dhaqaale ee labada dal loogu beddeli lahaa iskaashi ganacsi oo la taaban karo.

Kulanka ayaa lagu soo qaaday hagaajinta habraacyada kastamka iyo xuduudaha, fududeynta ganacsiga iyo isu-socodka badeecadaha, iyo ballaarinta fursadaha maalgashi ee labada dhinac.

Labada wasiir ayaa sidoo kale ka wada hadlay iskaashiga dhinacyada beeraha, xoolaha, kalluumeysiga, wax-soo-saarka, saadka iyo adeegyada, iyadoo la doonayo in meelahaasi ay noqdaan kuwo horseeda koboc dhaqaale iyo shaqo abuur.

Soomaaliya iyo Kenya oo labaduba xubno ka ah Bulshada Bariga Afrika (EAC) ayaa sidoo kale isla eegay sidii xubinnimada ururka loogu beddeli lahaa fursado ganacsi oo muuqda, iyadoo la waafajinayo dadaallada EAC iyo Aagga Ganacsiga Xorta ah ee Qaaradda Afrika (AfCFTA).

Kulankan ayaa ku soo beegmaya xilli Soomaaliya ay guddoominayso shirkii ugu horreeyay ee Wasiirrada Ganacsiga ee dalalka ku mideysan hindisaha Geeska Afrika, taas oo Muqdisho siinaysa door muuqda oo ku saabsan ajendaha ganacsi iyo is-dhexgalka dhaqaale ee gobolka.

Dowladda Soomaaliya ayaa sheegtay inay diyaar u tahay inay Kenya kala shaqeyso dhismaha xiriir dhaqaale oo qoto dheer, hufan oo la saadaalin karo, kaas oo fursado cusub u abuura ganacsatada iyo bulshada labada dal.

“Waxaan dooneynaa in xubinnimadeenna wadajirka ah ee Bulshada Bariga Afrika ay noqoto ganacsi dhab ah, maalgashi iyo fursado dhaqaale oo ay dareemaan shacabka labada dal,” ayuu yiri Wasiir Jamaal Maxamed Xasan .

Kulankan ayaa sidoo kale qayb ka ah dadaallada Soomaaliya ay ku xoojinayso xiriirrada ganacsi ee gobolka, iyadoo xoogga la saarayo isku-xirka suuqyada, fududeynta ganacsiga iyo ka faa’iidaysiga fursadaha dhaqaale ee ka dhasha is-dhexgalka gobolka.