Muqdisho (Dawan) – Soomaaliya iyo Kuuriyada Koonfureed ayaa ka wada hadlay sidii loo xoojin lahaa iskaashiga labada dal, gaar ahaan dhinacyada amniga badda, dhismaha awoodda hay'adaha dowladda iyo horumarinta xiriirka laba geesoodka ah, kadib marikii Wasiir-ku-xigeenka Arrimaha Dibadda iyo Iskaashiga Caalamiga ah ee Soomaaliya, Xasan Maxamed Cali, uu maanta Muqdisho ku qaabilay Danjiraha Jamhuuriyadda Kuuriyada Koonfureed u fadhiya Soomaaliya, Park Ji-Hyun.
Intii uu socday kulanka, labada dhinac ayaa dib u xaqiijiyay muhiimadda ay siinayaan sii ambaqaadidda iskaashiga muddada dheer ee u dhexeeya Soomaaliya iyo Kuuriyada Koonfureed. Waxay si gaar ah uga wada hadleen iskaashi ku saabsan amniga badda, tababarrada, kobcinta xirfadaha iyo awoodda shaqaalaha, iyo taageerada lagu horumarinayo hay'adaha dowladda.
