Mareykanka (Dawan ) – Dowladda Federaalka Soomaaliya ayaa heshiis isfaham (MoU) oo ku saabsan horumarinta macdanta muhiimka ah la saxiixatay Gobolka West Virginia ee dalka Maraykanka, sida lagu sheegay war-saxaafadeed kasoo baxay Wasaaradda Batroolka iyo Kheyraadka Macdanta ee Soomaaliya.
Heshiiskan ayaa diiradda saaraya iskaashi ku saabsan sahminta, soo saarista, farsamaynta, iyo horumarinta macdanta muhiimka ah (Critical Minerals), iyadoo ujeeddadu tahay in la dhiso qaab iskaashi oo kor u qaada maalgashiga, is-weydaarsiga aqoonta farsamada, iyo horumarinta silsiladda qiimaha ee macdanta Soomaaliya.
Heshiiska waxaa dhinaca Soomaaliya u saxiixay Wasiirka Batroolka iyo Kheyraadka Macdanta, Dahir Shire Maxamed, halka dhinaca Gobolka West Virginia uu u saxiixay Xoghayaha Senate-ka gobolka, Kris Warner.
Ra’iisul wasaare ku xigeenka Soomaaliya, Saalax Axmed Jaamac, iyo Wasiirka Batroolka Soomaaliya, oo hoggaaminaya wafdi, ayaa maalmihii lasoo dhaafay ku sugnaa dalka Maraykanka, iyadoo bilowgii bishaan Muqdisho lagu qabtay kulan looga hadlayay khayraadka dabiiciga ah ee Soomaaliya, kaasoo ay ka soo qeyb galeen maalgashadayaal ka socda Mareykanka iyo Dowladda Soomaaliya.
