Muqdisho (Dawan) – Soomaaliya iyo Turkiga ayaa u dhaqaaqay hirgelinta heshiiska iskaashiga kalluumaysiga ee labada dal, kaddib markii wafdi Turki ah uu booqday Dekedda Muqdisho si uu u qiimeeyo kaabeyaasha dekedda isla markaana uga wadahadlo diyaar-garowga howlaha kalluumaysiga ee la qorsheeyay, sida ay sheegeen sheegeen masuuliyiinta dekedda.
Wafdiga waxaa hoggaaminayay Turgay Türkyılmaz, agaasimaha guud ee Wasaaradda Beeraha iyo Kaymaha Turkiga, waxaana sidoo kale ka mid ahaa wakiillo ka socday shirkado Turki ah oo ka shaqeeya kalluumaysiga, sida uu sheegay ku xigeenka maareeyaha Dekedda Muqdisho, Cali Xaaji Maxamed.
Cali ayaa sheegay in wafdigu uu kormeeray kaabeyaasha dekedda isla markaana ay yeesheen wada-hadallo farsamo oo ku saabsan diyaarinta adeegyada looga baahan yahay maraakiibta kalluumaysiga, qaboojinta iyo farsamaynta kalluunka, iyo dhoofintiisa iyadoo la raacayo heshiiska labada dal.
"Waxaan rajaynaynaa in howshu ay dhowaan bilaabato," ayuu yiri Cali, isagoo intaa ku daray in Dekedda Muqdisho ay diyaar u tahay inay bixiso taageerada saadka ee lagama maarmaanka u ah howlaha kalluumaysiga ee la qorsheeyay.
