Accra (Dawan) – Wasiirka Caafimaadka iyo Daryeelka Bulshada ee Jamhuuriyadda Federaalka Soomaaliya, Dr. Cali Xaaji Aadan, ayaa ku matalayay Madaxweynaha Soomaaliya Shir Madaxeedka 20-aad ee Midowga Afrika oo diiradda lagu saaray caafimaadka, kaas oo lagu qabtay magaalada Accra ee dalka Ghana.
Shirka waxaa ka qeyb galay madaxda Midowga Afrika, madaxda dowladaha Afrika iyo hay’ado caalami ah, iyadoo looga hadlay xoojinta nidaamyada caafimaadka Afrika, hirgelinta daryeelka caafimaadka aasaasiga ah, la dagaallanka HIV/AIDS, dhimista dhimashada hooyada iyo carruurta, iyo la tacaalidda cudurrada faafa iyo kuwa aan faafin.
Khudbad uu ka jeediyay shirka, Dr. Cali Xaaji Aadan ayaa sheegay in Soomaaliya ay mudnaan gaar ah siisay hirgelinta daryeelka caafimaadka aasaasiga ah, isla markaana dowladda ay waddo dib-u-habeyn lagu xoojinayo xarumaha caafimaadka, shaqaalaha caafimaadka, adeegyada bulshada, nidaamyada caafimaadka ee dijitaalka ah iyo u diyaargarowga xaaladaha degdegga ah.
Wasiirka ayaa sheegay in daboolista adeegyada daryeelka caafimaadka aasaasiga ah ay Soomaaliya ka korortay qiyaastii 42% sannadkii 2020 ilaa in ka badan 65% sannadkii 2025, halka daboolista tallaalka qarankuna ay ku dhowdahay 70%. Waxa uu sidoo kale xusay in la hirgeliyay tallaal cusub oo badbaado nololeed, isla markaana la xoojiyay la socodka cudurrada iyo nidaamyada kormeerka.
