Muqdisho (Dawan) – Golaha Wasiirrada Xukuumadda Federaalka Soomaaliya ayaa maanta oo Khamiis ah ansixiyay heshiiska Qaramada Midoobay ee ilaalinta iyo isticmaalka waara ee kala duwanaanshaha noolaha badaha ee aagga ka baxsan awoodda qaran (BBNJ), taas oo Soomaaliya ka dhigaysa mid la jaanqaadaysa dadaallada caalamiga ah ee lagu ilaalinayo badaha.
Go’aankan ayaa lagu gaaray kulankii toddobaadlaha ahaa ee Golaha Wasiirrada, oo uu guddoominayay Ra’iisul Wasaaraha Xukuumadda Federaalka Soomaaliya, Xamsa Cabdi Barre, sida lagu sheegay war-saxaafadeed ka soo baxay xafiiskiisa.
Heshiiska BBNJ, oo ay Qaramada Midoobay ansixisay bishii Juun 2023, kadib wada-hadallo socday sanado badan oo hoos imanayay Heshiiska Qaramada Midoobay ee Sharciga Badaha (UNCLOS), ayaa ah kii ugu horreeyay ee si gaar ah diiradda u saaraya ilaalinta kala duwanaanshaha noolaha badaha caalamiga ah, kuwaas oo ka kooban ku dhawaad saddex-meelood laba meel badaha dunida.
